3. அழகர் அந்தாதி - 052/100 அழகனை முன்பு நினையாததால&

[sridharv1946]

3. அழகர் அந்தாதி - 052/100 அழகனை முன்பு நினையாததால் மீண்டும் பிறந்தேன் !

நினைப்பரியாய் எளியாய் உம்பர் யார்க்கும் , நின் அன்பர்க்கும்
வினைப்பரியானவன் வாய் பிளந்தாய் ! வியன் சோலை மலை
தனைப்பரியாநின்ற தாள் அழகா ! முன் சனனத்துள்ளும்
உனைப்பரியாமல் அன்றோ பரித்தேன் இவ்வுடலத்தையே !




பதவுரை : நினைப்பு + அரியாய்
வினை + பரியானவன் (குதிரை)
தனை + பரியாநின்ற (தாங்கப்படும் )
உனை + பரியாமல் (பக்தி செய்யாமல்)


உம்பர் யார்க்கும் நினைப்பு அரியாய் தேவர்கள் யாராலும் சிந்திக்க முடியாதவனே !
நின் அன்பர்க்கும் நினைப்பு எளியாய் உன் பக்தர்களுக்கு சிந்திக்க எளியவனே !
வினைப் பரியானவன் தீச் செயலுடைய கேசி எனும் குதிரையின்
வாய் பிளந்தாய் வாயைக் கிழித்தனவனே !
வியன் சோலை மலை தனை பெரிய திருமாலிருஞ்சோலை மலையால்
பரியா நின்ற தாள் அழகா தாங்கப் படும் திருவடிகள் கொண்ட அழகர் பிரானே !
முன் சனனத்துள்ளும் முன் பிறவிகளிலும்
உனைப் பரியாமல் அன்றோ உன் மீது பக்தி செய்யாததால் அன்றோ
இவ்வுடலத்தைப் பரித்தேன் இப்பிறவியை எடுத்தேன் !