திருவரங்கத்தந்தாதி 21 நம் அரங்கனுக்கு நமன

[sridharv1946]

திருவரங்கத்தந்தாதி 21 நம் அரங்கனுக்கு நமன் அஞ்சும் !


நரகந்தரம்புவியிம்மூன்றிடத்துநனிமருவு
நரகந்தரங்கித்துவெங்காலற்கஞ்சுவர்நாயகவா
நரகந்தரம்புட்பிடரேறரங்கர்நல்லாய்க்குலத்தி
நரகந்தரங்கமற்றரடியார்க்குநமனஞ்சுமே



பதவுரை :


நரகு நரகம் ,
அந்தரம் சுவர்க்கம் ,
புவி பூமி
இம்மூன்று இடத்தும் இந்த மூன்று உலகங்களிலும்
நனி மருவுநர் நன்கு வாழ்பவர்கள்
அகம் தரங்கித்து மனம் கலங்கி
வெம் காலற்கு கொடிய யமனுக்கு
அஞ்சுவர் பயப்படுவார்கள் .
நாயக வானர சிறந்த வானரமான ஹனுமானுடைய
கந்தரம் கழுத்தின் மேலும் ,
புள் பிடர் ஏறு கருடனுடைய பிடரியின் மேலும் ஏறும்
அரங்கர் ரங்கநாதனும் ,
நல ஆய்க்குலத்து சிறந்த இடையர் குலத்திற்கு
இனன் சூரியன் போன்றவரும,
தரங்கம் திருப்பாற்கடலை
அகம் உற்றார் வசிக்குமிடமாய் கொண்டவருமான நம் பெருமாளுடைய
அடியார்க்கு தொண்டர்களுக்கு
நமன் அஞ்சும் யமன் பயப்படுவான் !