3. அழகர் அந்தாதி - 008/100 அலங்காரர் நாமம் உரைத்து

[sridharv1946]

3. அழகர் அந்தாதி - 008/100 அலங்காரர் நாமம் உரைத்து ஏத்துமினே !

வித்தகரும்பரரசு ஆனவனும் விதியும் கங்கை
மத்தகரும்பரவும் அலங்காரர் மழை கொண்ட கார்
ஒத்தகரும்பரஞ்சோதியர்நாமம் உரைத்து அன்னைமீர்
இத்தகரும்பரதெய்வமும் கூத்தும் விட்டு ஏத்துமினே






பதவுரை : வித்தகர் + உம்பர் +அரசு
மத்தகரும் + பரவும்
ஒத்த + கரும் + பரஞ்சோதியர்
இத்தகரும் + பர + தெய்வமும்


அன்னைமீர் தாய் மார்களே !
இத் தகரும் பரதெய்வமும் இந்த ஆட்டுக்கடா பலியையும் , பிற தெய்வ வழிபாட்டையும்
கூத்தும் விட்டு வெறியாட்டங்களையும் ஒழித்து
உம்பர் அரசு ஆனவனும் விதியும் தேவ அரசனான இந்திரனும் , பிரமனும்
கங்கை மத்தகரும் பரவும் கங்கையைத் தலையில் உடைய சிவனும் வணங்கும்
கார் ஒத்த கரும் பரஞ்சோதியார் மேகம் போன்று கறுத்து , சிறந்த ஒளி கொண்டவரும்
அலங்காரர் வித்தகர் அழகரும் ஆன ஞான சொரூபனின்
நாமம் உரைத்து ஏத்துமினே பெயரைச் சொல்லித துதியுங்கள்