3. அழகர் அந்தாதி - 042/100 மறந்தும் வந்தனை செய்யேன

[sridharv1946]

3. அழகர் அந்தாதி -042/100 மறந்தும் வந்தனை செய்யேன் புறம் சில தேவரையே !

மோதாகவந்தனை மூட்டு இலங்கேசன் முடிந்து விண்ணின்

மீதாகவந்தனை வில் எடுத்தே விடை வெற்பில் நின்ற

நாதாகவந்தனைச் செற்றாய் ! உனை அன்றி நான் மறந்தும்

தீதாகவந்தனை செய்யேன் புறம் சில தேவரையே





பதவுரை :
மோது + ஆகவம் + தனை

மீது + ஆக + வந்தனை (வந்தாய்)

நாதா + கவந்தனை

தீது + ஆக + வந்தனை (வணக்கம்)


விடை வெற்பில் நின்ற நாதா ..ரிஷப கிரியில் நிற்கும் தலைவனே !

கவந்தனைச் செற்றாய் ..........கபந்தனைக் கொன்றவனே !

மோது ஆகவம் தனை மூட்டு ..தாக்கும் போரை வலிய உண்டாக்கி நடத்திய

இலங்கேசன் முடிந்து ............இலங்கை மன்னன் ராவணன் இறந்து

விண்ணின் மீது ஆக ..............மேல் உலகம் சேரும்படி ,

வில் எடுத்து வந்தனை ...........கோதண்டம் எனும் வில்லை கையில் எடுத்து
வந்தாய் .
உனை அன்றி .......................இப்படிப்பட்ட உன்னை விட்டு

மறந்தும் தீது ஆக .................மறந்தாயினும் தீமை வரும்படி ,

புறம் சில தேவரை ................வேறு சில தேவர்களை

நான் வந்தனை செய்யேன் ....நான் வணங்க மாட்டேன்