3. அழகர் அந்தாதி - 073/100 அலங்காரர் அந்தரங்கத் து

[sridharv1946]

3. அழகர் அந்தாதி - 073/100 அலங்காரர் அந்தரங்கத் துயர் தீர்க்க உலாவுவரே !

அரியவரந்தந்து , அயன் முதலோர்க்கு அருள் செய்து ; அவரைப்-
பெரியவரந்தம் இல் வாழ்வினர் , ஆக்கி ; தம் பேர் அருளால்
கரியவரந்தணர் கை தொழும் மால் அலங்காரர் - வையத்து ,
உரியவரந்தரங்கத் துயர் தீர்க்க உலாவுவரே

பதவுரை : அரிய + வரம் + தந்து
பெரியவர் + அந்தம் + இல்
கரியவர் + அந்தணர்
உரியவர் + அந்தரங்க

கரியவர் கருமை நிறம் கொண்டவரும் ,
அந்தணர் கை தொழும் வேதியர்கள் கை கூப்பி வணங்கும்
மால் அலங்காரர் பெருமை உடையவருமான அழகர் பிரான்
அயன் முதலோர்க்கு பிரமன் முதலிய தேவர்களுக்கு
அரிய வரம் தந்து அரிதான வரங்களைத் தந்து ,
அருள் செய்து கருணை புரிந்து ,
அவரைப் பெரியவர் அவர்களைப் பெருமை உடையவர்களாகவும் ,
அந்தம் இல் வாழ்வினர் ஆக்கி முடிவற்ற வாழ்வு உடையராகவும் செய்து ,
தம் பேர் அருளால் தமது பெரும் கருணையால்
வையத்து உரியவர் பூமியில் , தமது பக்தர்களுடைய
அந்தரங்கத் துயர் மனத் துன்பங்களை
தீர்க்க உலாவுவரே நீக்குவதற்கு உலா வருவார்.
--
V.Sridhar