5. திருவரங்கத்து மாலை - 55/114 : ஸ்ரீ கிருஷ்ண அவதார

[sridharv1946]

5. திருவரங்கத்து மாலை - 55/114 : ஸ்ரீ கிருஷ்ண அவதார வைபவம் 5/25

சிந்திக்காமல் , வந்திக்காமல் சிறு தாழி முத்தி பெற்றது என்னோ ?

சிந்திக்க நெஞ்சு இல்லை ; நா இல்லை , நாமங்கள் செப்ப ; நின்னை
வந்திக்க மெய் இல்லை , வந்து இரு போதும் ; மொய்ம் மாமலர் பூம்-
பந்தித் தடம் புடை சூழ் அரங்கா ! ததி பாண்டன் உன்னைச்-
சந்தித்த நாள் , முத்தி பெற்றது என்னோ , தயிர்த் தாழியுமே ?

பதவுரை :

மொய்ம் மாமலர்ப் நெருங்கிய பெரிய மலர்களை உடைய
பூம்பந்தித் தடம் புடை சூழ் அழகிய வரிசையாகிய தடாகங்கள் பக்கங்களில் சூழ்ந்த
அரங்கா திரு அரங்கத்து நாதனே !
சிந்திக்க நெஞ்சு இல்லை உன்னை தியானிக்க மனம் இல்லை ;
நாமங்கள் செப்ப நா இல்லை உனது பெயரைச் சொல்ல நா இல்லை ;
இரு போதும் வந்து காலை , மாலை இரு பொழுதும் வந்து
நின்னை வந்திக்க மெய் இல்லை உன்னை வணங்க உடம்பு இல்லை ;
ததி பாண்டன் ஆனால் ததிபாண்டன் என்பவன்
உன்னைச் சந்தித்த நாள் உன்னை அடைந்து முக்தி பெற்ற பொழுது
தயிர்த் தாழியுமே அவனுடன் , அவனது தயிர்க் குடமும்
முத்தி பெற்றது என்னோ முத்தி உலகம் அடைந்தது எவ்வாறோ ?


அடுத்து வருவது : ஸ்ரீ கிருஷ்ண அவதார வைபவம் 6/25

V.Sridhar