5. திருவரங்கத்து மாலை - 89/114 : ஆதி சேஷன்

[sridharv1946]

5. திருவரங்கத்து மாலை - 89/114 :ஆதி சேஷன்

அரங்கர்க்கு அனந்தனே அனைத்தும் !

சென்றால் குடை ஆம் ; கடல் புணை ஆம் ; திருத் தீவிகை ஆம் ;
நின்றால் இரு திருப் பாதுகை ஆம் ; நித்திரைக்கு அணை ஆம் ;
குன்றா மணி ஒளி ஆசனம் ஆம் ; புனை கோசிகை ஆம்
அன்று ஆலிலையில் துயில் அரங்கேசர்க்கு அரவு அரசே


பதவுரை :


அன்று பிரளய காலத்தில்
ஆலிலையில் துயில் ஆலிலையில் யோகநித்திரை செய்த
அரங்கேசர்க்கு திரு அரங்க நாதனுக்கு
அரவு அரசே திரு அனந்தாழ்வான் ஆன ஆதி சேஷன்
சென்றால் குடை ஆம் உலா வரும் போது குடை ஆகும் ;
கடல் புணை ஆம் கடலில் உறங்கும் போது மெத்தை ஆகும் ;
திருத் தீவிகை ஆம் பார்க்கும் போது மங்கள தீபம் ஆகும் ;
நின்றால் இரு திருப் பாதுகை ஆம் நிற்கும்போது ஸ்ரீ பாதுகை ஆகும் ;
நித்திரைக்கு அணை ஆம் உறங்கும்போது திரு அணை ஆகும் ;
குன்றா மணி ஒளி ஆசனம் ஆம் அமரும்போது பிரகாசமான சிம்மாசனம் ஆகும் ;
புனை கோசிகை ஆம் உடுத்தும்போது அழகிய வஸ்த்ரம் ஆகும்


V.Sridhar