6. திரு வேங்கட மாலை 017/104 : வேங்கடமே சேவடி வாய்ப்

[sridharv1946]

6. திரு வேங்கட மாலை 017/104 : வேங்கடமே சேவடி வாய்ப்பச் சென்றான் சேர்பு !

நோவினையும் நோயினையும் நோய் செய் வினையினையும்
வீவினையும் தீர்த்து அருளும் வேங்கடமே - மூ வினை செய்
மூவடிவாய்ப்பச்சென்றான் முன்னாள் அகலிகைக்குச்
சேவடிவாய்ப்பச்சென்றான் சேர்பு

பதவுரை :

மூவடிவாய்ப்பச்சென்றான் - மூ + வடிவு + ஆய + பச் + என்றான்
சேவடிவாய்ப்பச்சென்றான் - சே + அடி + வாய்ப்ப + சென்றான்

நோவினையும் பிறத்தல் ஆகிய துன்பத்தையும் ,
நோயினையும் வருத்தம் கொடுக்கும் வியாதிகளையும் ,
நோய் செய் வினையினையும் இவைகளுக்குக் காரணமான கருமங்களையும் ,
வீவினையும் மரண வேதனையையும்
தீர்த்து அருளும் வேங்கடமே நீக்கி அருளுகின்ற வேங்கடமே
மூ வினை செய் படைத்தல் , காத்தல் , அழித்தல் எனும் மூன்று தொழில்களை செய்யும்
மூ வடிவாய் அயன் , அரி , அரன் எனும் மூன்று வடிவங்களாய் ஆனவனும் ,
பச்சென்றான் பசுமை நிறத்தவனும் ,
முன்னாள் அகலிகைக்கு ராமவதாரத்தில் அகலிகைக்கு
சேவடிவாய்ப்ப சிவந்த தன திருவடி சித்தி அளிக்கும்படி
சென்றான் சேர்பு நடந்து சென்றவனுமான திருமாலின் சேருமிடம் .

V.Sridhar